Xiaomi prezanton Mix Fold 2 me kamera të zhvilluara në bashkëpunim me Leica
Themeluesi dhe CEO i Xiaomi, Lei Jun, mbajti fjalimin e tij të përvitshëm ditën e djeshme gjatë së cilit prezantoi dhe smartphone-in e dytë të palosshëm të kompanisë, Xiaomi Mix Fold 2.
Mix Fold 2 është një ndër pajisjet më të holla të palosshme, vetëm 5.4mm i trashë kur është i hapur, dhe 11.2mm kur është i mbyllur. Ai është pak më i hollë se Galaxy Z Fold 4 që ka trashësi 6.3mm/15.8mm.
Në pjesën e jashtme Mix Fold 2 ka një ekran 6.56 inç AMOLED me raport pamje 21:9 me refresh rate 120Hz dhe që mbrohet nga Gorilla Glass Victus. Xiaomi shtoi gjithashtu një kamera selfie 20MP në këtë ekran në formën punch hole.
Ekrani i brendshëm OLED ka madhësi 8 inç dhe përdor teknologjinë LTPO2, me refresh rate që lëviz nga 1-120 Hz, duke ulur kështu konsumin e baterisë. Ky ekran mbështet HDR10+ dhe Dolby Vision dhe ka një ndriçim maksimal 1,300 nits.
Për të fuqizuar pajisjen është përdorur Snapdragon 8+ Gen 1, i cili shoqërohet nga 12GB RAM dhe 1TB internal storage. Kjo pajisje ka një bateri 4,500mAh e cila mund të karikohet shpejt me karikuesen 67W. Sistemi operativ do të jetë MIUI Fold 13 i bazuar në Android 12.
Mix Fold 2 është pajisja e 2-të që përfiton nga pashkëpunimi i Xiaomi me Leica dhe është i pajisur me një lente kryesore 50MP, një ultrawide 13MP dhe një telephoto me zmadhim 2x.
Mix Fold 2 do të vijë në 2 ngjyra: Black dhe Gold, dhe çmimi fillestar do të jetë $1,340 për versionin bazë 12/256GB.
Burimi: Geek Room
