Xiaomi prezanton robotin humanoid para Tesla, i cili kushton $104,000

Tashmë robotët janë gjithnjë e më të pranishëm në jetën tonë, jo vetëm në formën e automatizimit, por tashmë kanë marrë dhe pamjen e humanëve. Xiaomi ka prezantuar robotin e saj të parë humanoid, një robot që kushton $104,000 dhe e ka emrin CyberOne.

CyberOne ecën si një njeri normal dhe është i pajisur me teknologji AI e cila e lejon atë të zbulojë deri në 45 emocione humane të ndryshme. Prezantimi i tij vjen vetëm një muaj para prezantimit të shumëpritur të robotit humanoid nga Tesla, Optimus.

“Me AI në qendër të tij dhe një trupi humanoid, ky është një eksplorim i mundësive të teknologjive të së ardhmes në ekosistemin e Xiaomi dhe një avancim teknologjik i rëndësishëm për kompaninë.” tha Lei Jun, themelues dhe CEO i Xiaomi Group.

Roboti është i gjatë 177 cm dhe peshon 52 kg. Algoritmi AI me të cilin është pajisur ky robot bën të mundur që ai të perceptojë hapësirën 3D, si dhe të njohë individë, gjestet e tyre dhe shprehjet e fytyrës. Sipas Xiaomi, ky robot mund të njohë 85 zhurma ambientale të ndryshme si dhe 45 emocione humane.

“CyberOne është në gjendje të kuptojë emocionet humane dhe të qetësojë përdoruesit në kohën kur ata ndihen të mërzitur.” tregohet në deklaratën e kompanisë.

Burimi: Geek Room